Жайық өзені сағасының жағдайы Атырау облысы басшылығының бақылауында

Жергілікті атқарушы орган өкілдері, өңірлік Қоғамдық кеңес мүшелері мен  табиғатты қорғау құрылымдары өкілдерінен құралған жұмыс тобы Жайық өзенінің сағасына барды, Өңірлік коммуникациялар қызметі хабарлайды.

Жұмыс тобының құрамында облыс әкімінің орынбасары Қайрат Нұртаев, балық шаруашылығы басқармасының басшысы Артур Сәдібекұлы, Табиғи ресурстар және табиғатты пайдалануды реттеу басқармасының басшысы Нұрлан Жантоқов, экология және табиғи ресурстар министрлігі Жайық-Каспий облысаралық балық шаруашылығы бассейндік инспекциясының басшысы Нұрлыбек Гайсин және эко белсенділер бар. 

Соңғы жылдары Жайық өзенінде судың аздығы байқалады. Үкімет пен жергілікті билік тарапынан өзен арнасын тереңдету секілді нақты жұмыстар атқарылуда. Бұл жобалар ұзақ мерзімді болғандықтан, өзен сағасын үнемі бақылауды қажет етеді.

Жұмыс тобының мүшелері өзеннің теңізге құятын жеріне барып тереңдігін өлшеді. Тереңдігі 30-40 см (жарты метрден аз) көрсетті. Содан кейін учаскелер сағадан шамамен 10 км қашықтықта зерттелді, ол жерде тереңдігі екі метрден асатыны анықталды.

Облыс әкімінің орынбасары Қайрат Нұртаев Жайық-Каспий облысаралық бассейндік балық шаруашылығы инспекциясына таяу күндері дәл координаттар қойып, өлшеудің әрбір нақты нүктесінде тереңдіктерді көрсете отырып, сағалық кеңістіктің жай-күйін егжей-тегжейлі зерделеуді тапсырды. Болашақта бұл деректер өзен бетін мұздан толық тазартумен жалғасатын түп тереңдету жұмыстарын жүргізу кезінде пайдаланылады. Сондай-ақ, бұл деректер көктемгі су тасқыны кезінде су тасқынына қарсы іс-шараларды дайындау кезінде ескеріледі.