Өткен жылы Атырауда №2 УПП арқылы тіркелген 114 қылмыстың 85 пайызы ашылған

Былтыр Атырау қалалық полиция басқармасына қарасты №2 учаскелік полция пункті арқылы тіркелген 114 қылмыстың 95-і немесе 85 пайызы ашылған. Бұл туралы №2 УПП-нің инспекторы полиция майоры Айбол Ідірісов «Аулада қабылдау» акциясы барысында мәлім етті, деп хабарлайды Өңірлік коммуникациялар қызметі.

Акцияның мақсаты - халықпен тығыз кері байланыс орнату, азаматтарды толғандырып жүрген өзекті мәселелерді анықтау, құқық бұзушылықтың алдын-алу және құқықтық тәртіпті нығайту. 

-Ішкі істер министрлігінің нұсқауына сай, осы жылғы 12 ақпан мен 30 наурыз аралығында «Аулада қабылдау» акциясы өтуде. Мұндағы мақсат - полицияның сервистік моделінің аясында халық полицияны іздеп емес, керісінше полиция халыққа келіп, олардың мұң-мұқтажын тыңдап, сұрақтарына жауап беру. Бұл жерде халықтан тек полицияға қатысты сұрақтар түсіп жатқан жоқ, басқа да мазалап жүрген сұрақтар қойылуда. Сондай-ақ бұл жиынға депутаттар, ЖКХ мамандары, сонымен қатар әкімшілік қызметкерлер де қатысып отыр,- деді Атырау облысы Полиция департаменті бастығының бірінші орынбасары Абдигани Сейдуалиев.  

Іс-шарада Атырау ҚПБ ЖПҚБ №2 УПП жұмысын ұйымдастыруға жауапты учаскелік полиция инспекторы Айбол Ідрісов баяндама жасап, өткен жылы атқарылған жұмыстарға тоқталып өтті. 

-№2 УПП 8 әкімшілік аумақтан құрылған, мұнда 7 учаскелік полиция инспекторы қызмет атқаруда. Әкімшілік аумақта барлығы 270 тұрғын үй орналасқан. Былтыр 114 қылмыс тіркеліп, оның 95-і ашылды немесе пайыздық көрсеткіші 85%. Оның ішінде ең көбі – ұрлық. 47 ұрлықтың 38-і ашылды. Одан кейінгі орында алаяқтық, ол бойынша тіркелген 18 фактінің 12-і ашылды. Сонымен қатар қызметкерлермен 1020 әкімшілік құқық бұзушылық анықталды. Оның ішінде қоғамдық орындарға мас келу, ортақ пайдаланатын орындарды ластау, тіркеусіз не жеке бас құжатынсыз тұру, отбасы-тұрмыстық қатынастар аясындағы құқыққа қарсы әрекеттер алдыңғы орында болып тұр,- деді А.Ідірісов.  

Сондай-ақ, іс-шара барысында биыл осы саладағы құқықтық қатынастарды реттейтін қолданастағы заңнамаға өзгерістер енгізілгені, құқық бұзышылық жасалған жағдайда әскерет ету алгоритмі түсіндіріліп, проблемалық мәселелер талқыланды.