Атырауда ардагерлер арасында кіші аяқ доптан облыстық турнир өтті

Облыстық «Ауған соғысы ардагерлер одағы» қоғамдық бірлестігінің ұйымдастыруымен өңір ардагерлері арасында кіші аяқ доптан облыстық турнир өтті, деп хабарлайды Өңірлік коммуникациялар қызметі.

Іс-шара Кеңес әскерлерінің Ауған жерінен шыққанына 35 жыл толуына орай ұйымдастырылды. 

Спорттық сайыстың басты мақсаты - ардагерлер арасында салауатты өмір салтын қалыптастырып, достық қарым-қатынасты нығайту.

Ауған соғысының ардагері Мұратбек Кенжеахметов турнирге қатысушы ардагерлерге сәттілік тілеп, ұйымдастырушыларға алғыс білдірді.

-Бүгінде 35 жылдық қарсаңында іс-шаралар ауқымды түрде өткізілуде. Соның бірі осы ардагерлер арасындағы футболдан турнир. Іс-шараның өтуіне белсене атсалысып, қолдау көрсеткен барша жандарға алғысымызды білдіреміз. Ардагерлердің ерлік істерін жас ұрпаққа дәріптей отырып, оларды таныту, еңбектерін елеусіз қалдырмау үшін өткізілген әр іс-шара біз үшін маңызды. Сайыс қатысушыларына сәттілік тілеймін! Елімізде тек тыныштық болып, қуанышты күндеріміз үзілмесін, - М.Кенжеахметов. 

Турнирге облыс ардагерлерінен құралған «Санжар», «Болат», «Каспий», «Махамбет» және «Мелиоратор» мен «Шурави» атты 6 команда қатысып, бақтарын сынады.

Жарысты қорытындылай келе, жүлделі I орынды «Санжар» командасы иеленсе, II орынды «Махамбет», ІІІ орынды «Болат» командасы еншіледі.