Азия ойындарының жүлдегерлері мектеп оқушыларымен кездесті

фото: Аймақтық байланыс қызметі.

Бүгін Атырау облысының дене шынықтыру және спорт басқармасының ұйымдастыруымен, Әл-Фараби атындағы BINOM мектеп-лицейінде, Қытайда өтіп жатқан Азия ойындарының жүлдегерлері Әбиба Әбужақынова мен Эсмигуль Куюлова мектеп оқушыларымен кездесті. Бұл туралы Өңірлік коммуникациялар қызметі хабарлайды.

Іс-шара жүлдегер жерлестеріміздің жетістігін насихаттап, жастардың өнегелі үлгі алады деген мақсатпен ерекшеленіп отыр. Қос спортшы сөз алдын өмірдегі кез-келген жетістік - еңбектің арқасы екендігінен бастады.

Спорт немесе білім саласындағы жетістік, ерен еңбекті талап етеді. Оқуда үздік болыңыздар. Ата-ананың үмітін ақтай отырып, ауыр жауапкершілік арқалай біліңіздер. Жеңістің дәмін сүрінуден, құлаудан, қайта тұрудан кейін тата аласыздар. Ешқашан мойымаңыздар!- деді Ә.Әбужақынова.

Кейін, оқушылар қос жүлдегерге сұрақ қойып, жалынды жауаптарын естіді. Естелік фотосуретке түсіп, жеңімпаздардан қол таңба алды.

Айта кетейік, Әбиба Әбужақынова - қазақ қыздары арасында алғаш рет әлем чемпионатында топ жарған дзюдошы. ХІХ жазғы Азия ойындарының күміс медаль иегері. Ал, Эсмигуль Куюлова - ХІХ жазғы Азия ойындарының дзюдодан қола жүлдегері.