Облыс әкімінің орынбасары Түркия Республикасының Ақтау қаласындағы Бас консулын қабылдады

Бүгін облыс әкімінің орынбасары Марат Мурзиев Түркия Республикасының Ақтау қаласындағы Бас консулы Сабри Альптекинмен кездесті, Өңірлік коммуникациялар қызметі хабарлайды

Кездесуде Марат Мурзиев Бас консул Сабри Альптекинге ілтипат білдіре отырып, көп жылдан бергі бауырластық  және сауда-экономикалық қарым-қатынастың қос тарапқа да жемісті болғанын, одан әрі дамытуға мүдделі екенін жеткізді.

- Бүгінгі күні Атырау облысында 120-дан астам компания түрік капиталымен жұмыс атқарып жатыр. Биыл Атырау облысы мен Түркия арасындағы сауда-саттықтың көлемі 1 млрд долларды құрайды. Атырау өңірінде мұнай мен газдан басқа өнеркәсіптер бар. Біз оларды жақсы деңгейге шығарсақ деген ойымыз бар. Соның ішінде облыста туризм саласын дамыту бағытында да үлкен жұмыстар істеуге болады, - деді М.Мурзиев.

Жиында Атырау облысының инвестициялық мүмкіндіктері,  туризм мен білім саласын дамыту, достық қарым-қатынасты нығайту  мәселесі талқыланды. 

Өз кезегінде Бас консул облыс әкімінің орынбасары Марат Мурзиевке ризашылығын білдірді. Кейін Түркияда білім алып жатқан қазақ студенттерге қарастырылған мүмкіндіктер туралы айтып өтті. 

- Сауда-саттық, энергия мен туризм салаларынан кейін, білім саласына да көңіл бөлген жөн. Сонымен қатар қазір Түркия мемлекетінде оқып жатқан қазақ студенттерінің саны күннен күнге артып жатыр. Түркия мемлекетінің стипендиялық бағдарламасы бар. Бағдарлама бойынша Қазақстанға өте көп квота бөлінеді, - деді С.Альптекин.

Анықтама үшін: 2023 жылдың қаңтар-шілде айларында Атырау облысының Түркиямен сыртқы сауда айналымы 1,0 млрд. АҚШ долларын құрады.