«Ерекше балалар» 1-ші маусым күнін ерекше атап өтті

Атыраудағы №3 Арнаулы қызметтер көрсету орталығында балалар күніне орай  мерекелік іс-шара өтті, деп хабарлайды Өңірлік коммуникацялар қызметі. 

- Салтанатты іс-шара орталық демеушілерінің қолдауымен ұйымдастырылып, жоғары деңгейде өтті. Мерекелік жиынға «Болашақ-Атырау» кәсіпорны, «Халық» банк, Ұлттық қауіпсіздік комитеті және «Навруз» этно-мәдени орталығының өкілдері мен «Қазақстан Халық партиясы» облыстық филиалының төрайымы арнайы келіп, балаларға базарлық жасады. Ал, «Өмір» қоғамдық бірлестігі мерекелік іс-шараны безендіріп берді,- деді №3 Арнаулы қызметтер көрсету орталығының басшысы Анар Маратова. 

Ерекше мұқтаждықтары бар балаларға қызмет көрсететін бұл орталықтан 68 бала қызмет алады. Бүгінгі іс-шараға төсекке таңылған балалардан бөлек 50 тәрбиеленуші қатысты. Олар ән айтып, би билеп көрермен қошеметіне ие болды.

Айта кетейік, салтанатты іс-шараға арнайы келген «Қазақстан Халық партиясы» облыстық филиалының төрайымы Балжан Досмұхамедова «осы орталықтың тұрақты меценаты боламын» деп кесіп айтты. 

Еске салайық, №3-ші орталыққа тұрақты қолдау көрсетіп келе жатырған «Болашақ-Атырау» кәсіпорны мұндағы аутизм орталығына жөндеу жұмыстарын жүргізуде.